Yeni ildə bir-birinə hədiyyə vermək çox ailələrdə ənənəyə çevrilib. Bu bayramda yerli xanımlardan məhsullar alaraq yeni ili onlar üçün ikiqat bayrama çevirmiş olursunuz. Aşağıdakı şirkətlər azərbaycanlı qızlar tərəfindən idarə olunur.
Lütfən onlardan sifariş edin və yerli brendlərə dəstək olun! Bayramınız mübarək!
Günel əl işlərini keçədən hazırlayır. Bu rəngbərəng əsərləri kim sevməz? Hazırda yeni il hədiyyəsi kimi fincan altlıqları, xarici pasport üzlükləri, əlfəcinlər və yeni il oyuncaqları hazırlayır. Bu şirin əl işlərindən sevdiklərinizdə də olsun!
Şəkildəki Əslidir. Toxucunun yaradıcısı və toxuyanı. Biznesinə bu ilin yayında start verib. Gözəl papaqlar, şərflər, corablar toxumaqla yanaşı Əsli hələ xeyriyyə aksiyaları da keçirir! Bu qədər böyük qəlbli toxucudan mütləq sifariş edin!
Bu şirkətin mənim ürəyimdə başqa yeri var. Günel və Gülərdən etdiyim sifariş haqda yazmışdım. Kağız burma üsulu ilə hazırladıqları əl işləri nəfəs kəsir! Siz təsəvvür edə bilirsinizsə, onlar yarada bilirlər. Bu bacarıqlı qızlara siz də dəstək olun!
Yerli, sərfəli dizayner geyim brendi naveen.az Nəzrin tərəfindən idarə olunur. Özü İT sahəsində təhsil alsa da dizayn və modaya marağı olub. İntern filminə baxandan sonra Naveen şirkətini yaratmaq qərarına gəlib və bir ay ərzində 40-50 sifariş alıb. Bacarıqlı Nəzrinə müraciət edin, sizin üçün də əsrarəngiz paltar hazırlasın!
Ülviyyə incə tikişlərlə broşlar, çokerlər, əlfəcinlər hazırlayır. Retro stilini xatırladan bu zərif əsərlər istənilən xanımın qarderobuna gözəl əlavədir. Ülviyyə biznesini yaratmazdan əvvəl çox çətinliklərdən keçib, odur ki, öz işini qurmaq istəyənlərə ilhamlandırıcı mesajı var:
İş qurmaq istəyən qızlara əminliklə öz bizneslərini qurmağı tövsiyyə edərdim. Çünki əvvəla ailədən maddi cəhətdən asılı olmamağa başladığınız an daha da müstəqilləşirsiniz və bu azadlığa doğru atılan böyük bir addımdır. 2-cisi hər qadın öz pulunu əziyyət çəkərək qazanmalıdır ki, gələcəkdə ailənin büdcəsini tənzimləməyi bacarsın və ailə qurduğu insanın qazandığı pula sadəcə kağız kimi baxmasın. Həqiqətən, insan özü qazandıqca pulun dəyərini anlayır. Unutmayın ki, hər birimizin digərlərindən daha yaxşı bacardığı bir iş vardır. Özünüzü kəşf edin, bacarıqlarınızı tapın, hədəfinizi qoyun və ona doğru əmin addımlarla addımlayın. Biz bacarmışıqsa, siz də bacararsınız. 🙂
Günay xanım sim, gips, muncuqlar, bəzən qurudulmuş ağac budaqları və çiçəklərdən ağaclar hazırlayır. Səhifəsini isə sevimli oxucularımdan olan qızı Röya idarə edir. Bilmirəm bu işləri niyə belə ucuz satırlar, amma hədiyyə verildiyi adamda “wow!” effekti yaradacağı dəqiqdir!
Nərmin gündəlik işlətdiyimiz əşyalara fərqli görünüş gətirir. O, fərdi telefon qabları, fincanlar, balış üzləri hazırlayır. Səhifəsini keçən ilin dekabrında yaradan tələbə Nərmin universitetə yolpulunu çıxartmaq üçün çalışıb. Amma indi daimi müştəriləri var və işini çox sevdiyini deyir. Nərminin mağazasında hamı üçün bir şey var, siz də sevdiklərinizi onun əl işləri ilə sevindirin.
Yəmən iqtisadiyyat sahəsi üzrə təhsil alsa da əl işlərinə marağı böyük olub. Çoxlu araşdırdıqdan sonra insanların özlərinə bənzəyən “selfie” gəlinciklər hazırlamaq qərarına gəlib. Öz dediyinə görə əvvəldə ona “Kimdir səndən kukla alan?!” “Onsuz da alınmayacaq” kimi sözlər deyib onu ruhdan salanlar çox olub. Amma Yəmən işinə İnstagram səhifə açmaqla start verib. Bir neçə ay sonra isə artıq sifarişləri az qala çatdırmır. Bəs sizin selfie doll-unuz varmı?
Balaca uşaqlar üçün fərdi nağıl və hekayə kitabları çap edən bu şirkət Ceyhun və Əsmər tərəfindən idarə olunur. Uşaq nağılın baş qəhrəmanı olur və kitabda onun şəkilləri və adından istifadə olunur. Bu kitabların hamısından oğlum Aleksə almışam. Onların “Sən dünyanı dəyişə bilərsən” kitabı hər bir uşağın kitabxanasında olmalıdır!! Kitab dizayndan, rəsmlərdən tutmuş çapa qədər Made in Azerbaijandır.
Kəmalənin zərif əllərinin məhsulu olan bu bijuteriyalar muncuqlardan hazırlanır. Sadə don və bluzlara əsrarəngiz əlavədir! Onun səhifəsinə göz atın və sevdiyiniz xanımlara gözəl hədiyyənizi Kəmalədən alın.
Digər sahələrdəki uğurlu iş qadınlarını da siyahıda görmək xoş olardı )
gelen yazilarda 🙂
Pingback: Azərbaycanlı qızların idarə etdiyi 10 biznes – bulud.org
Reblogged this on Günel Fərhadqızı Emin (Antimental).