Mişel Poler bir neçə ay əvvəl Venesueladan Nyu Yorka magistr təhsili almaq üçün köçüb. Dünyanın ən dəli şəhərində olduğu müddətdə ən böyük qorxularını yenmək üçün videolayihə başlayıb. Belə ki, 100 gün ərzində heç vaxt cəsarət etmədiyi və ya etməkdən qorxduğu şeyləri həyata keçirmək qərarına gəlib.

Mişel 100 gün ərzində qorxularını yenmək üçün küçədə dilənib, şəhərdə çimərlik paltarında gəzib (abır, həya, mentalitet), böyük auditoriya qarşısında çıxış edib, Tayms Meydanının ortasında dayanmadan rəqs edib, rəssamlıq tələbələrinə çılpaq poz verib (səni kim alajax, ay Mişel?), təyyarə sürməyi öyrənib, bir gün ərzində nüfuzlu şirkətlərin qapılarını döyüb iş istəyib, öz həyat yoldaşı, qaynana və qaynatasının qarşısında qoca çılpaq kişinin bədənində şəkil çəkib (“hətta bu qızı da alan olub, mən evdə qalmışam!”) və daha nələr nələr…

Mişelin çılğınlığı, qorxularını və həyatı ciddiyə almamağı və optimist ruhu adama ləzzət eləyir. Onun videolarını aşağıda izləyə bilərsiniz.

Bəs sizin ən böyük qorxularınız nələrdir?

Qalan videoları izləmək üçün Mişelin 100 days without fear saytına baş çəkin.